पत्रकार दिपक भागवत यांना मारहाणीच्या निषेधार्थ चिपळुणमध्ये मुक मोर्चा

 पत्रकार दीपक भागवत यांच्यावरील हल्ल्याचा निषेध;  चिपळूणमध्ये मूक मोर्चा- दोषींवर कडक कारवाई करण्याची मागणी; कारवाई न झाल्यास उपोषणाचा इशारा..

चिपळूण | प्रतिनिधी-

दूरदर्शनचे प्रतिनिधी आणि ज्येष्ठ पत्रकार दीपक भागवत यांच्यावर झालेल्या भ्याड हल्ल्याच्या निषेधार्थ आज चिपळूण शहरात राधाई फाउंडेशनच्या वतीने भव्य मूक मोर्चा काढण्यात आला. बहादूरशेख नाका ते उपविभागीय पोलीस अधिकारी कार्यालयापर्यंत काढण्यात आलेल्या या मोर्चाद्वारे गुन्हेगारांवर कठोर कारवाई करण्याची मागणी करण्यात आली.हा

महापुरुषांना अभिवादन करून मोर्चाची सुरुवात-

मोर्च्याच्या प्रारंभी बहादूरशेख नाका येथील महामानव डॉ. बाबासाहेब आंबेडकर यांच्या पुतळ्याला पुष्पहार अर्पण करून आणि अभिवादन करून मोर्चाला सुरुवात झाली. हातामध्ये निषेधाचे फलक आणि दंडाला काळी फीत बांधून सहभागी आंदोलकांनी शांततेच्या मार्गाने आपला संताप व्यक्त केला. हा मोर्चा मार्कंडी मार्गे शिवसृष्टी येथे पोहोचला, तिथे छत्रपती शिवाजी महाराज यांच्या पुतळ्याला अभिवादन करण्यात आले. त्यानंतर चिंचनाका आणि बसस्थानक मार्गे हा मोर्चा उपविभागीय पोलीस अधिकारी कार्यालयावर धडकला.

पोलीस प्रशासनाला निवेदन-

मोर्चाची सांगता पोलीस उपाधीक्षक कार्यालयाजवळ झाली. यावेळी राधाई फाउंडेशनच्या अध्यक्षा सौ. राधा लवेकर, छावा मराठा संघटनेचे जिल्हाध्यक्ष श्रीकांत कांबळी, पत्रकार दीपक भागवत आणि दैनिक 'रत्नागिरी टुडे'च्या संपादिका सौ. दीक्षा भागवत यांनी पोलीस उपाधीक्षक श्री. बेले यांची भेट घेऊन त्यांना  निवेदन दिले.

काय आहे मागणी?-

 २५ मार्च २०२६ रोजी दीपक भागवत यांच्यावर झालेला हल्ला हा लोकशाहीच्या चौथ्या स्तंभावर झालेला हल्ला असल्याचे सांगत सौ. राधा लवेकर यांनी या घटनेचा तीव्र निषेध केला. या हल्ल्यातील मुख्य सूत्रधार आणि आरोपींना तातडीने अटक करण्याची मागणी त्यांनी केली. निवेदनात असे म्हटले आहे की,"पत्रकारांवर होणारे असे हल्ले निंदनीय आहेत. जर या प्रकरणात पोलिसांनी तत्परतेने कारवाई केली नाही, तर पोलीस स्टेशनसमोर उपोषण करण्यात येईल," असा इशारा छावा मराठा संघटनेचे जिल्हाध्यक्ष श्रीकांत कांबळी यांनी यावेळी दिला.

नागरिकांचा उत्स्फूर्त प्रतिसाद-

शहराच्या मध्यवर्ती भागातून निघालेल्या या मूक मोर्चाने नागरिकांचे लक्ष वेधून घेतले. रस्त्याच्या दुतर्फा उभे राहून नागरिक या घटनेची माहिती घेत होते आणि पत्रकार संरक्षण कायद्याची कडक अंमलबजावणी व्हावी, अशी चर्चा सर्वसामान्यांमध्ये सुरू होती. या मोर्चात विविध क्षेत्रांतील मान्यवर आणि पत्रकार मोठ्या संख्येने सहभागी झाले होते.